- Акцыя праходзіць ужо восьмы раз для напаміну аб тым, як важна скарачаць шкодныя выкіды ў атмасферу, большая частка якіх паступае ад аўтамабіляў, - адзначае намеснік старшыні Мінскага гарадскога камітэта прыродных рэсурсаў і аховы навакольнага асяроддзя Таццяна Дубік. - Мы прапануем вадзіцелям зрабіць выбар на карысць альтэрнатыўных спосабаў перамяшчэння. А іх нямала: грамадскі транспарт, у тым ліку - экалагічны электрычны, веласіпеды, самакаты, манаколы, сегвеі.
Парадокс у тым, што Мінск адчувае значную нагрузку выкідаў ад аўтатранспарту, маючы камфартабельнае метро, развітую сетку аўтобусных і тралейбусных маршрутаў, сучасныя прыгарадныя электрычкі, добраўпарадкаваныя веладарожкі.
- Згодна са статыстыкай, 80 працэнтаў выкідаў забруджвальных рэчываў у атмасфернае паветра прыпадае на аўтамабілі і толькі 20 працэнтаў - на прамысловыя прадпрыемствы горада, - прыводзіць лічбы Таццяна Дубік. - Даныя аўтаматычных станцый з бесперапынным рэжымам вымярэння стану забруджвання атмасфернага паветра сведчаць: канцэнтрацыя аксідаў азоту і вугляроду вышэйшая ў гадзіны пік. Яны ўзрастаюць з 7 да 9 гадзін раніцы і з 17 да 19 гадзін вечара. Гэта звязана з павелічэннем інтэнсіўнасці руху аўтатранспарту.
Напярэдадні Дня без аўтамабіля ў Мінску, пачынаючы з 2016 года, праводзяць эксперымент па вымярэнні канцэнтрацый асноўных забруджвальных рэчываў у атмасферным паветры на скрыжаванні вул. Я. Коласа і Кульман, у парку адпачынку імя М. Горкага, зоне рэкрэацыі "Парк камянёў".
- Па выніках вымярэнняў у Дзень без аўтамабіля штогод устанаўліваецца зніжэнне колькасці ўзроўню азоту дыаксіду, вугляроду аксіду, фармальдэгіду ў атмасферным паветры ў 1,2-1,3 раза, - канстатуе эксперт.
Таццяна Дубік адзначае, што поўнасцю падлічыць колькасць вадзіцеляў, якія адмовіліся ад асабістых машын у час акцыі, складана. Дакладныя падлікі магчымы толькі ў метро. Паводле даных Мінскага метрапалітэна, у 2022 годзе падземным транспартам у Дзень без аўтамабіля скарысталіся 15484 чалавекі, на год раней - 10215 чалавек. Паўтаракратны рост.
- У гэтым годзе, 22 верасня, "Мінсктранс" і "Мінскі метрапалітэн" таксама не будуць спаганяць плату за праезд пры прад'яўленні пасажырам вадзіцельскага пасведчання і пасведчання аб рэгістрацыі транспартнага сродку, - нагадала Таццяна Дубік.
Акрамя таго, пройдзе традыцыйная акцыя "На работу на веласіпедзе!" з бясплатнай раздачай фруктаў веласіпедыстам у чатырох кропках горада. Гараджане змогуць бясплатна пачаставацца і атрымаць інфармацыйныя матэрыялы аб Дні без аўтамабіля. Фрукты будуць раздаваць каля ўвахода ў Цэнтральны батанічны сад НАН Беларусі на пр. Незалежнасці, каля "Мінск-Арэны" на баку веладарожкі (пр. Пераможцаў, 111), на пр. Партызанскім, 30, а таксама каля шматузроўневага паркінга на пр. Дзяржынскага, 13.
Акрамя таго, 22 верасня прадаставяць скідку на арэнду некаторых шэрынгавых веласіпедаў і электрасамакатаў. Яшчэ ў Дзень без аўтамабіля пройдзе велапрабег "Беларусь за чыстае паветра!", адначасова прымеркаваны да Года міру і стварэння. Маршрут - ад вул. Маякоўскага да помніка "Беларусь партызанская", дзе адбудзецца ўскладанне кветак.
Аляксей ГАРБУНОЎ,
газета "7 дней".-0-