Трубіла: сістэму абыходжання з камунальнымі адходамі будзем удасканальваць
Навіны
04.10.2024 | 09:49
У Беларусі будзе ўдасканальвацца сістэма абыходжання з камунальнымі адходамі. Аб гэтым паведаміў міністр жыллёва-камунальнай гаспадаркі Генадзь Трубіла на пашыраным выязным пасяджэнні Пастаяннай камісіі па экалогіі і прыродакарыстанні Палаты прадстаўнікоў "Перапрацоўка адходаў і выкарыстанне другасных матэрыяльных рэсурсаў як фактар эканамічнага развіцця Беларусі", перадае карэспандэнт БЕЛТА.
Генадзь Трубіла нагадаў, што ў рэспубліцы прынята нацыянальная стратэгія па абыходжанні з цвёрдымі камунальнымі адходамі і другаснымі матэрыяльнымі рэсурсамі, дзе дакладна прапісаны алгарытм дзеянняў. Вялікая работа праведзена па ліквідацыі палігонаў для пахавання ЦКА, якія аказвалі негатыўнае ўздзеянне на навакольнае асяроддзе. Засталося 152 такія аб'екты, тады як у 2012 годзе іх налічвалася звыш 3 тыс.
Разгарнулася маштабнае будаўніцтва смеццеперапрацоўчых заводаў: узводзяцца буйныя заводы ў Мінску, Ваўкавыскім раёне, пабудаваны такія прадпрыемствы ў Бабруйску, Оршы, іншых гарадах. Пад Гроднам запускаецца вытворчасць RDF-паліва, першая партыя гатова і паступіць для спальвання на цэментным заводзе ў Краснасельску. "Гэты вопыт паглядзім і ў далейшым распаўсюдзім на рэспубліку, каб мінімізаваць пахаванне адходаў", - адзначыў Генадзь Трубіла.
Паводле яго слоў, трэба будзе выбудаваць аптымальную стратэгію ў сферы абыходжання з адходамі. Галоўная задача - перапрацаваць усё, што можа быць выкарыстана. На гэты час у краіне дзейнічае 81 лінія сартавання. "Але мы бачым, прааналізаваўшы сітуацыю, што гэтага недастаткова, асабліва малых ліній сартавання. Дзесьці яны ўжо выйшлі са строю", - дадаў міністр.
Пасяджэнне прайшло на базе рэспубліканскага навукова-даследчага ўнітарнага прадпрыемства "Беларускі НДЦ "Экалогія". Яго ўдзельнікі абмеркавалі пытанні эфектыўнасці сістэмы абыходжання з адходамі вытворчасці і спажывання, прымаемыя меры па максімальным атрыманні другасных матэрыяльных рэсурсаў і ўключэнні іх у гаспадарчы абарот.-0-
БЕЛТА - Навiны Беларусi
