Белгідрамет: дажджы і невысокая тэмпература забяспечаць умовы для росту позніх сельгаскультур
8 жніўня, Мінск /Кар. БЕЛТА/. Дажджы і невысокая тэмпература забяспечаць умовы для росту позніх сельгаскультур. Аб гэтым БЕЛТА паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Збожжавыя культуры на няўбраных плошчах у асноўным дасягнулі поўнай спеласці. Няўстойлівае надвор'е не дазваляе падтрымліваць высокія тэмпы жніва, з-за дажджоў час работы камбайнаў скарачаецца. Дажджы, якія праходзяць, увільгатняюць колас, умовы для прасыхання збожжа пагаршаюцца", - адзначылі ў Белгідрамеце.
У многіх раёнах краіны, дзе напярэдадні прайшлі найбольш інтэнсіўныя дажджы, назіраецца пераўвільгатненне верхняга слоя глебы. На астатняй тэрыторыі верхні слой глебы знаходзіцца ва ўмерана вільготным стане. "Ранейшыя і чаканыя дажджы павялічаць колькасць вільгаці ў глебе і ў спалучэнні з невысокімі тэмпературамі забяспечаць добрыя ўмовы для росту і развіцця позніх сельскагаспадарчых культур, адрастання траў", - расказалі ў цэнтры.
