Белгідрамет: праект новай пяцігадовай праграмы СД па гідраметэаралогіі амаль гатовы
21 сакавіка, Мінск /Кар. БЕЛТА/. Праект новай пяцігадовай праграмы Саюзнай дзяржавы па гідраметэаралогіі амаль гатовы. Аб гэтым паведаміў на прэс-канферэнцыі начальнік службы міжнароднага супрацоўніцтва і сувязей з грамадскасцю Белгідрамета Мінпрыроды Андрэй Карабчук, перадае карэспандэнт БЕЛТА.
"Мы плённа працуем з Расгідраметам і навукова-даследчымі ўстановамі, якія ўваходзяць у яго структуру. Паспяхова завяршылася рэалізацыя праграмы Саюзнай дзяржавы на пяцігадовы перыяд - з 2017-га па 2021-ы. На працягу 2022 года Белгідрамет сумесна з Расгідраметам распрацоўвалі праект праграмы на чарговую пяцігодку. Ужо ёсць пэўнае бачанне, што гэта будзе за праграма, якія туды будуць уваходзіць мерапрыемствы. Праект праграмы знаходзіцца ў высокай ступені гатоўнасці", - сказаў Андрэй Карабчук.
Паводле яго, у хуткім часе плануецца пачаць унутрыдзяржаўную працэдуру ўзгаднення. "Праграма нам патрэбна, і мы прыкладаем усе намаганні, каб яна была рэалізавана", - падкрэсліў прадстаўнік Белгідрамета.
Як паведамлялася, у ліку асноўных задач папярэдняй саюзнай праграмы "Развіццё сістэмы гідраметэаралагічнай бяспекі Саюзнай дзяржавы" на 2017-2021 гады было павысіць якасць прагнозаў надвор'я. Яна таксама прадугледжвала распрацоўку сучасных сістэм кантролю і маніторынгу тэрытарыяльнага і трансгранічнага забруджвання навакольнага асяроддзя, развіццё сістэмы кліматычнага абслугоўвання насельніцтва і галін эканомікі Беларусі і Расіі, удасканаленне сістэмы маніторынгу навакольнага асяроддзя Саюзнай дзяржавы з выкарыстаннем дыстанцыйных сродкаў назіранняў, развіццё і гарманізацыю адзінай метадычнай базы ў галіне гідраметэаралогіі.-0-
