Лукашэнка аб'явіў II Гульні краін СНД адкрытымі
05.08.2023
5 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка ў час урачыстай цырымоніі ў "Мінск-Арэне" аб'явіў II Гульні краін СНД адкрытымі, паведамляе БЕЛТА.
Афіцыйная частка цырымоніі адкрыцця Гульняў пачалася з урачыстага падняцця сцягоў Беларусі і СНД. Пад гукі Дзяржаўнага гімна беларускі сцяг паднялі знакамітыя спартсмены - двухразовая алімпійская чэмпіёнка па акадэмічным веславанні Кацярына Карстэн, алімпійскі чэмпіён па скачках на батуце Іван Літвіновіч і алімпійскі чэмпіён па веславанні на каноэ-двойцы Аляксандр Масяйкоў. Яшчэ трое вядомых беларускіх атлетаў - алімпійскія чэмпіёнкі па лёгкай атлетыцы Яніна Правалінская-Карольчык і Юлія Несцярэнка і алімпійскі чэмпіён па гандболе Андрэй Барбашынскі - прынялі ўдзел у цырымоніі падняцця сцяга Садружнасці Незалежных Дзяржаў.
Кіраўнік дзяржавы Аляксандр Лукашэнка звярнуўся да ўдзельнікаў, арганізатараў і гледачоў Гульняў, пажадаўшы ўдачы, перамог, яркага відовішча і вялікага мора пазітыўных эмоцый.
Разам з многімі тысячамі гледачоў, якія напоўнілі трыбуны "Мінск-Арэны", беларускі лідар назіраў за яркім відовішчным паказам, удзельнікамі якога сталі больш за тысячу чалавек, у тым ліку вядучыя артысты беларускай эстрады, вакальныя і харэаграфічныя прафесійныя і аматарскія калектывы.
Кульмінацыяй цырымоніі стала запальванне Агню Гульняў. Гэта традыцыя бярэ пачатак са спартыўных спаборніцтваў старажытных грэкаў, і звычайна факел для запальвання агню давяраюць вядомаму чалавеку. Але на гэты раз арганізатары вырашылі зрабіць выключэнне і даручылі ўрачыстую місію юнай гімнастцы, прызёру рэспубліканскіх спаборніцтваў па мастацкай гімнастыцы Аляксандры Зубовіч, якую суправаджалі прызёр чэмпіянатаў свету і Еўропы па мастацкай гімнастыцы, майстар спорту міжнароднага класа Анастасія Салас і галоўны трэнер нацыянальнай каманды Беларусі па самба, шматразовы чэмпіён Еўропы і свету па спартыўным самба Юрый Рыбак.
Выступленне Прэзідэнта Беларусі Аляксандра Лукашэнкі на ўрачыстай цырымоніі адкрыцця II Гульняў краін СНД
Дарагія сябры!
Паважаныя атлеты, трэнеры, суддзі, арганізатары і, вядома ж, гледачы!
Я вітаю ўсіх, хто знаходзіцца тут, на "Мінск-Арэне". Усіх, хто сочыць за цырымоніяй адкрыцця анлайн.
Беларуская зямля прымае Гульні краін Садружнасці Незалежных Дзяржаў.
Зноў да нас прыкавана ўвага мільёнаў балельшчыкаў ва ўсім свеце. Гэтак жа, як і чатыры гады таму, калі на нашых стадыёнах гучалі пераможныя фанфары Другіх Еўрапейскіх гульняў.
Іх агонь, запалены ў Мінску, не згас. Ён гарыць верай у алімпійскія ідэалы, сапраўдную справядлівасць і спартыўнае братэрства. Ён аб'ядноўвае шчырых сяброў, верных і надзейных, - людзей з жалезным характарам.
Ён сабраў нас разам.
Тут пануе цудоўная атмасфера. Вы ствараеце яе сваімі эмоцыямі, адкрытасцю, дружалюбнасцю.
Дзякуй вам вялікі.
Удзячны кіраўніцтву краін - удзельніц Садружнасці Незалежных Дзяржаў. Усіх краін, якія прыехалі да нас. Вы аказалі Беларусі давер, і мы дастойна правядзём гэты спартыўны форум. У яго вялікая будучыня.
І гэта будучыня ў нашых руках. Як бы ні імкнуліся яе адабраць сусветныя заправілы - азлобленыя і бяссільныя. Перакананы, яны нас таксама сёння бачаць.
Глядзіце, слухайце, рабіце высновы.
Вы спрабуеце выкрасліць моцных канкурэнтаў з міжнароднага спорту.
Вы хочаце адабраць нашы спартыўныя перамогі.
Вы знішчаеце дух і сэнс алімпійскага руху.
Гэта прыкмета слабасці і вашага страху.
Гэта спроба схавацца за жалезнай заслонай ад праўды жыцця.
Вы спрабуеце схавацца ад праўды жыцця. Гэта прызнанне сілы нашых глыбінных каштоўнасцей, якія падзяляе пераважная большасць людзей на планеце, у тым ліку звычайныя, простыя еўрапейцы і амерыканцы.
Паглядзіце. Тут сабраліся тысячы. Трансляцыю глядзяць мільёны.
Усе ўбачаць не толькі нашу выдатную Беларусь, але і культуру тых дваццаці краін, якія прадстаўлены вядучымі спартсменамі. Вы ўбачыце традыцыі, вы ўбачыце гераічную гісторыю Беларусі, якая характэрна для ўсіх краін Садружнасці. Вы пераканаецеся, што Беларусь мае цудоўную, чароўную прыроду.
Усе ўбачаць сучасныя арэны, моцных атлетаў, яркія паядынкі і новыя рэкорды, а галоўнае - вялікую міжнародную цікавасць да гэтых Гульняў.
Да нас прыехалі звыш дзвюх тысяч спартсменаў з больш як дваццаці краін розных кантынентаў.
Ніякія санкцыі, ніякія палітычныя інтрыгі не пазбавяць нас гэтага свята. Гэта немагчыма. Свет цесны, узаемазалежны, узаемаўвязаны. І толькі безразважныя спрабуюць разарваць гэтыя сувязі.
Дарагія сябры!
Я ўпэўнены, нашым гасцям будзе цёпла, утульна і, самае галоўнае, спакойна, душэўна спакойна на беларускай зямлі.
Мы зрабілі і будзем рабіць усё для гэтага. І для таго, каб Гульні краін Садружнасці сталі сапраўдным сімвалам дружбы, міру і стварэння.
Дэвіз нашых Гульняў - "Моцны характар - яркая гульня!". Гэта не толькі пра спорт. Гэта пра кожнага з нас.
Настаў час мужных і рашучых людзей, людзей, здольных пастаяць за гонар краіны, за перамогі сваіх бацькаў і будучыню сваіх дзяцей. Гэта - наш час.
Жадаю ўсім спартсменам - удзельнікам Гульняў удачы і вялікіх асабістых дасягненняў. Вам хачу сказаць: спартсмены, не перажывайце. Нас немагчыма - ні расіян, ні беларусаў, іншых - выкрасліць з міжнароднага алімпійскага і спартыўнага руху. Вы заўсёды будзеце запатрабаваны. Вы заўсёды будзеце ў справе.
Трэнерам - мудрасці і цярпення.
Балельшчыкам - яркага відовішча, незабыўных уражанняў і вялікага мора пазітыўных эмоцый.
Аб'яўляю Другія Гульні краін Садружнасці Незалежных Дзяржаў адкрытымі!-0-
