Пашырэнне паставак беларускай тэхнікі і ліфтавага абсталявання ў Алтай абмеркавалі на пасяджэнні рабочай групы
29 верасня, Мінск /Кар. БЕЛТА/. У Горна-Алтайску пад сустаршынствам міністра прыродных рэсурсаў і аховы навакольнага асяроддзя Андрэя Худыка і кіраўніка Алтая Алега Харахордзіна адбылося IV пасяджэнне рабочай групы па супрацоўніцтве Беларусі і Алтая, паведамілі БЕЛТА ў прэс-службе Мінпрыроды.
У мерапрыемстве прынялі ўдзел зацікаўленыя з беларускага і расійкага бакоў: прадстаўнікі органаў дзяржаўнай улады, гандлёва-прамысловых палат, суб'ектаў гаспадарання, навуковых і акадэмічных колаў. У рамках пасяджэння абмеркавалі бягучую сітуацыю супрацоўніцтва Беларусі і Алтая ў рамках выканання пагаднення паміж урадам Беларусі і ўрадам Алтая ў гандлёва-эканамічнай, навукова-тэхнічнай і сацыяльна-культурнай сферах, а таксама плана супрацоўніцтва на 2023-2025 гады па рэалізацыі гэтага пагаднення.
Адкрываючы пасяджэнне, кіраўнік Мінпрыроды Беларусі падкрэсліў, што для нашай краіны Расійская Федэрацыя - традыцыйна ключавы партнёр на міжнароднай арэне. Ён таксама адзначыў, што рабочая група па супрацоўніцтве Беларусі і Алтая павінна ўнесці свой уклад у паглыбленне беларуска-расійскага супрацоўніцтва па ўсім спектры напрамкаў.
"Я ўпэўнены, што наш патэнцыял значна перасягае рэзультаты, якія дасягнуты на гэты момант, і цяпер перад намі стаіць задача рэалізаваць яго ў поўнай меры, - дадаў Андрэй Худык. - Так, беларускія вытворцы адзначаюць гатоўнасць пашырыць пастаўкі ў Алтай трактароў, камбайнаў, іншай сельскагаспадарчай тэхнікі і абсталявання, лесанарыхтоўчай тэхнікі і тэхнікі для здабычы торфу, пасажырскай тэхнікі, тэхнікі для пажаратушэння, а таксама ліфтавага абсталявання. Ёсць шэраг напрамкаў і з іншых сфер".
У ходзе пасяджэння былі заслуханы даклады па ўсім спектры міждзяржаўных адносін у рамках рэалізацыі плана супрацоўніцтва.
Бакі адзначылі існуючы значны патэнцыял па далейшым паглыбленні двухбаковага ўзаемадзеяння для забеспячэння сацыяльна-эканамічнага развіцця Беларусі і Алтая. Завяршаючы пасяджэнне, кіраўнік беларускага прыродаахоўнага ведамства падкрэсліў, што праведзеныя сёння дыскусіі сведчаць аб тым, што цяпер патэнцыял двухбаковага ўзаемадзеяння яшчэ толькі пачынае па-сапраўднаму раскрывацца.
"Новыя перспектывы для нас адкрываюцца практычна штодзень. І наша задача - выкарыстоўваць іх максімальна эфектыўна, - упэўнена заявіў міністр. - На мой погляд, важнейшы вынік гэтага пасяджэння рабочай групы менавіта ў існуючым у нас разуменні таго, што наш патэнцыял практычна бязмежны".
Па выніках мерапрыемства бакамі быў падпісаны пратакол IV пасяджэння рабочай групы па супрацоўніцтве Беларусі і Алтая.-0-
