Развіццё экатурызму на асабліва ахоўных прыродных тэрыторыях Міншчыны абмеркавалі ў заказніку "Налібоцкі"
12 ліпеня, Мінск /Кар. БЕЛТА/. Развіццё экалагічнага турызму на асабліва ахоўных прыродных тэрыторыях Мінскай вобласці абмеркавалі ў заказніку "Налібоцкі", паведамілі БЕЛТА ў прэс-службе Мінпрыроды.
На базе дзяржаўнай прыродаахоўнай установы "Рэспубліканскі ландшафтны заказнік "Налібоцкі" адбылося выязное пасяджэнне рабочай групы па развіцці экалагічнага турызму Міжведамаснага экспертна-каардынацыйнага савета па турызме пры Савеце Міністраў Беларусі, якое прайшло пад старшынствам першага намесніка міністра прыродных рэсурсаў і аховы навакольнага асяроддзя Аляксандра Корбута.
У ходзе мерапрыемства ўдзельнікі наведалі шэраг турыстычных аб'ектаў: экалагічную сцежку "Сябрыньскае скрыжаванне", урочышча з тарпанападобнымі коньмі, а таксама гадавальнік па ўзнаўленні цецеруковых відаў птушак, дзе расплоджваюць заходнееўрапейскі падвід глушца Маера.
На пасяджэнні абмяркоўваліся пытанні развіцця экалагічнага турызму на асабліва ахоўных прыродных тэрыторыях Мінскай вобласці, а таксама дзейнасць у гэтай сферы ў Рэспубліканскім ландшафтным заказніку "Налібоцкі".-0-
