Саюзныя парламентарыі заклікалі паскорыць распрацоўку праграмы па пераадоленні наступстваў аварыі на ЧАЭС
4 кастрычніка, Масква /Эдуард Півавар - БЕЛТА/. Саюзныя парламентарыі заклікалі паскорыць распрацоўку новай праграмы па пераадоленні наступстваў аварыі на Чарнобыльскай АЭС. Аб гэтым БЕЛТА паведамілі ў прэс-службе Парламенцкага сходу Саюза Беларусі і Расіі па выніках праведзенага 4 кастрычніка ў рэжыме відэа-канферэнц-сувязі пасяджэння Камісіі Парламенцкага сходу па прыродных рэсурсах, экалогіі і ахове навакольнага асяроддзя.
"Дэпутаты разгледзелі пытанне аб распрацоўцы праграмы сумеснай дзейнасці Беларусі і Расіі ў рамках Саюзнай дзяржавы па пераадоленні негатыўных наступстваў у выніку аварыі на Чарнобыльскай АЭС. Раней парламентарыі адзначалі важнасць рэалізацыі праграм у сферы ліквідацыі наступстваў аварыі на ЧАЭС. Папярэдняя праграма Саюзнай дзяржавы, разлічаная на 2019-2022 гады, была нацэлена на стварэнне ўмоў бяспечнай жыццядзейнасці насельніцтва на радыеактыўна забруджаных тэрыторыях Беларусі і Расіі, пацярпелых у выніку чарнобыльскай катастрофы. Дэпутаты Парламенцкага сходу рэкамендавалі МНС Беларусі і МНС Расіі паскорыць работу па ўзгадненні сумеснай прапановы аб распрацоўцы "Праграмы сумеснай дзейнасці Беларусі і Расіі ў рамках Саюзнай дзяржавы па пераадоленні негатыўных наступстваў у выніку аварыі на Чарнобыльскай АЭС". Пастаяннаму камітэту Саюзнай дзяржавы рэкамендавана аказаць дапамогу дзяржаўным заказчыкам у распрацоўцы неабходных дакументаў і правядзенні ўстаноўленых пагаджальных працэдур", - расказалі ў прэс-службе.
Удзельнікі пасяджэння разгледзелі таксама ход выканання мерапрыемства Саюзнай дзяржавы "Аказанне комплекснай медыцынскай дапамогі асобным катэгорыям грамадзян Беларусі і Расіі, якія зведалі радыяцыйнае ўздзеянне ў выніку катастрофы на Чарнобыльскай АЭС" за першае паўгоддзе 2023 года. Дэпутаты канстатавалі, што Дэкрэтам аб бюджэце Саюзнай дзяржавы на 2023 год на рэалізацыю мерапрыемства прадугледжана 229 млн 992,5 тыс. расійскіх рублёў. Касавае выкананне за першае паўгоддзе склала 100 працэнтаў.
Акрамя таго, парламентарыям была прадастаўлена інфармацыя аб ходзе падрыхтоўкі сумеснай прапановы аб распрацоўцы праграмы Саюзнай дзяржавы "Забеспячэнне гідраметэаралагічнай бяспекі ва ўмовах зменлівасці і змянення клімату" на 2024-2028 гады. Дэпутаты рэкамендавалі Белгідрамету і Расгідрамету аператыўна завяршыць работу па ўзгадненні сумеснай прапановы аб распрацоўцы праграмы Саюзнай дзяржавы на чарговы перыяд, а таксама прынялі рашэнне разгледзець на наступным пасяджэнні камісіі пытанне аб укараненні атрыманых рэзультатаў па завершаных саюзных праграмах у галіне гідраметэаралогіі.
Акрамя саюзных парламентарыяў у пасяджэнні прынялі ўдзел прадстаўнікі Пастаяннага камітэта Саюзнай дзяржавы, Белгідрамета і Расгідрамета, МНС Беларусі і МНС Расіі.-0-
