Ці магчыма ў Беларусі адкрыць вялікае радовішча "чорнага золата"? Адказаў кіраўнік "Беларуснафты"

22 ліпеня, Мінск /Кар. БЕЛТА/. У Беларусі яшчэ могуць быць зроблены адкрыцці ў частцы вялікіх радовішчаў нафты. Аб гэтым журналістам заявіў генеральны дырэктар "Беларуснафты" Аляксандр Ляхаў пасля нарады ў Прэзідэнта па пытаннях здабычы вуглевадароднай сыравіны, перадае карэспандэнт БЕЛТА.

Як адзначыў Аляксандр Ляхаў, сённяшняя нарада яшчэ раз пацвердзіла, што кіраўнік дзяржавы цудоўна разумее важнасць для эканомікі здабычы айчыннай нафты. Кіраўнік кампаніі нагадаў, што на такой нарадзе ў мінулым годзе Прэзідэнт паставіў задачу "свідраваць яшчэ больш".

"Калі гаварыць пра апошнія пяць гадоў, то ў нас у кампаніі бурэнне свідравін узрасло больш як у два разы. Будаўніцтва новых свідравін з'яўляецца залогам росту здабычы нафты ў краіне. Мы практычна з рэзультата 1 млн 645 тыс. т за сем гадоў падымаемся да планкі больш як 2 млн т. Апошні раз такі ўзровень здабычы нафты ў краіне быў у 1992-1993 гадах", - падкрэсліў Аляксандр Ляхаў.

Прэзідэнт паставіў задачу выхаду з геолагаразведачнымі работамі ў паўднёвыя раёны Гомельскай вобласці. "Беларуснафта" будзе весці гэту работу сумесна з Мінпрыроды. "Са здабычай нафты ў нас у краіне ёсць перспектывы. Я думаю, яшчэ не зроблены апошнія адкрыцці, якія ўнясуць свой уклад у патэнцыял эканомікі нашай краіны", - дадаў гендырэктар "Беларуснафты".

Аляксандр Ляхаў лічыць, што ёсць шанц адкрыцця буйнейшых радовішчаў, але сёння асноўны рост здабычы нафты ў краіне звязаны з цяжказдабыўнымі запасамі, што знаходзяцца на дзеючых радовішчах.

У сваю чаргу, намеснік міністра прыродных рэсурсаў і аховы навакольнага асяроддзя Віктар Галанаў звярнуў увагу, што паміж Мінпрыроды, НПЦ па геалогіі і "Беларуснафтай" падпісана пагадненне аб далейшай інтэнсіфікацыі работ па геолагаразведцы ў галіне вуглевадародаў на бліжэйшыя пяць гадоў. Паміж імі размежаваны сферы дзейнасці. Мінпрыроды і НПЦ па геалогіі будуць працаваць на слабавывучаных тэрыторыях Прыпяцкага прагіну. "Беларуснафта" актывізуе работы на ўжо дзеючых радовішчах, павышаючы іх прадукцыйнасць.

"Задача, якая стаіць перад Мінпрыроды і НПЦ па геалогіі, заключаецца ў тым, каб выявіць новыя радовішчы на слабавывучаных тэрыторыях, стварыць геалагічны фонд інфармацыі, якая ў далейшым можа быць выкарыстана ў мэтах павелічэння здабычы нафты і газу", - растлумачыў намеснік міністра.-0-