У Белавежскай пушчы расказалі пра будаўніцтва навукова-даследчага цэнтра вывучэння прыроды

18 ліпеня, Брэст /Кар. БЕЛТА/. У нацыянальным парку "Белавежская пушча" будуюць міжнародны навукова-даследчы цэнтр вывучэння дзікай прыроды. Ужо вырысоўваюцца контуры будынка, паведамілі БЕЛТА ў нацпарку.

Гэта адно з мерапрыемстваў, прадугледжаных канцэпцыяй па развіцці нацыянальнага парку. У цэнтры будуць праводзіць экалагічныя і біялагічныя даследаванні. У будынку размесцяцца лабараторыі (батанікі, лесазнаўства, зубразнаўства і заалогіі), навучальныя і канферэнц-залы. Таксама будуць арганізаваны даследчыя пляцоўкі для правядзення палявых работ.

"Для забеспячэння высокага ўзроўню навуковых даследаванняў плануецца прыцягненне вучоных і спецыялістаў з розных галін біялагічных навук, для якіх будуць адкрыты новыя вакансіі загадчыкаў лабараторый і навуковых супрацоўнікаў, - расказалі ў навуковым аддзеле. - Чакаецца, што стварэнне навуковага цэнтра прыцягне маладых вучоных і даследчыкаў, а таксама павысіць прэстыж нацыянальнага парку як цэнтра навуковай дзейнасці. Гэта дасць магчымасць не толькі паглыбіць веды аб прыродных рэсурсах нацыянальнага парку, але і распрацаваць эфектыўныя меры па іх захаванні і аднаўленні".

Канцэпцыя развіцця Белавежскай пушчы прадугледжвае інфраструктурныя змяненні і рэбрэндынг. У прыватнасці, гасцей сустракае абноўленая ўязная брама - галоўны ўваход у нацпарк з боку аграгарадка Каменюкі Камянецкага раёна. Цяпер гэта шматфункцыянальны комплекс з магазінамі, кафэ, інфармацыйным цэнтрам, пунктам пракату. Таксама новы выгляд набылі закусачная Дзеда Мароза, кірмашовыя рады "Падкова", дэманстрацыйныя вальеры з дзікімі жывёламі. Работы прадоўжацца на іншых аб'ектах. Напрыклад, Дзед Мароз са свайго ранейшага дома ў перспектыве пераедзе ў больш прасторны. Намечана, што ў Белавежскай пушчы для турыстаў уладкуюць дадатковыя месцы адпачынку.-0-