У Дзень без аўтамабіля выкіды ад мабільных крыніц скарачаюцца на 100-200 т па ўсёй краіне
22 верасня, Мінск /Кар. БЕЛТА/. Штогод у дзень без аўтамабіля выкіды ад мабільных крыніц скарачаюцца на 100-200 т па ўсёй краіне. Аб гэтым расказаў старшыня Мінскага гарадскога камітэта прыродных рэсурсаў і аховы навакольнага асяроддзя Валянцін Шатраўка, паведамляе карэспандэнт БЕЛТА.
"Сённяшні велапрабег накіраваны на тое, каб прыцягнуць увагу мінчан да экалогіі горада. Думаю, правядзенне такіх акцый пасадзейнічае таму, што людзі будуць больш актыўна перасаджвацца на экалагічныя віды транспарту і гэта будзе ўплываць на стан паветра горада. Па выніках мінулага года ў велапрабегу прынялі ўдзел каля 100 чалавек. Сёння, мяркуючы па папярэдняй рэгістрацыі, ён будзе больш маштабным. Паводле даных Мінпрыроды, штогод у час правядзення Дня без аўтамабіля выкіды ад мабільных крыніц скарачаюцца на 100-200 т па ўсёй краіне. Каб павялічыць гэту лічбу, будзем і далей прадаўжаць прапагандаваць экатранспарт і развіваць гэты напрамак у сталіцы", - запэўніў старшыня Мінскага гарадскога камітэта прыродных рэсурсаў і аховы навакольнага асяроддзя.
У рамках Дня без аўтамабіля для вадзіцеляў пры прад'яўленні пасведчання, а таксама пасведчання аб рэгістрацыі транспартнага сродку арганізаваны бясплатны праезд у грамадскім транспарце. Паводле слоў Валянціна Шатраўкі, іх колькасць будуць фіксаваць і на аснове гэтага падлічаць змяншэнне ад выкідаў мабільных крыніц. У 2021 годзе 10,2 тыс. вадзіцеляў скарысталіся бясплатным праездам, а ў 2022 годзе - ужо 15,5 тыс. Такім чынам, колькасць прыхільнікаў экаакцыі з кожным годам расце.
"Стан паветра ў Мінску ў апошнія гады даволі нядрэнны. Ён ацэньваецца як добры і здавальняючы. Ёсць перыяды, калі стан паветра ў асобных пунктах перавышае дапушчальныя нарматывы ў 1,2 раза. У асноўным гэта адбываецца з-за пыльных часцінак, якія прыносяцца ў сувязі з сухасцю паветра і павышэннем скорасці ветру", - расказаў старшыня Мінскага гарадскога камітэта прыродных рэсурсаў і аховы навакольнага асяроддзя.
Велапрабег стартаваў з паркоўкі Мінскага гарадскога Палаца культуры (Маякоўскага, 129) і праходзіць па маршруце ўздоўж вул.Маякоўскага, па тратурах уздоўж вуліц Манюшкі, Смоліча, Турава, Карзюкі, Галадзеда, Лучыны, Ташкенцкай, Кабушкіна, далей - выезд на праспект Партызанскі. Напрыканцы ўдзельнікі велапрабегу ўскладуць кветкі да помніка "Беларусь партызанская".
У Мінску з 16 па 22 верасня праходзіць Тыдзень мабільнасці, а 22 верасня сусветная супольнасць адзначае Сусветны дзень без аўтамабіля. У гэты дзень людзей заклікаюць адмовіцца ад выкарыстання аўтамабіля. Мэта акцыі - скараціць колькасць аўтамашын на вуліцах і дарогах, а таксама падтрымаць іншыя віды ўстойлівага транспарту, уключаючы грамадскі і веласіпедны.-0-
