Унікальны праект. Тарпанападобныя коні цяпер будуць жыць у пойме Заходняй Бярэзіны

4 лістапада, Мінск /Кар. БЕЛТА/. Тарпанападобныя коні цяпер будуць жыць у пойме Заходняй Бярэзіны, паведамілі БЕЛТА ў прэс-службе Мінлясгаса.

Больш за 30 жывёл гэтымі днямі змянілі месца "прапіскі". Гэта стала магчымым дзякуючы рэалізацыі міжнароднага праекта "Пашырэнне тэрыторыі пражывання папуляцыі тарпанападобнага каня ў рэспубліканскім ландшафтным заказніку "Налібоцкі" і аднаўленне адкрытых месцапражыванняў у пойме ракі Заходняя Бярэзіна".

Асноўная мэта праекта - захаванне і аднаўленне біялагічнай разнастайнасці лясных і лугавых экасістэм поймы ракі Заходняя Бярэзіна шляхам рассялення тарпанападобных коней. "Коні павінны "расчысціць" пойму ракі, якая зведала працэс бур'янізацыі, і зрабіць яе прыдатнай для пражывання шэрага жывёл адкрытых пойменных месцапражыванняў (сеўцападобныя, гусепадобныя). Таксама плануецца выпрабаваць гэты метад аднаўлення адкрытых месцапражыванняў для аднаўлення зарастаючага цецеруковага такавішча", - падкрэслілі ў Мінлясгасе.

Наступным этапам стане перасяленне на адноўленыя пойменныя лугі зуброў з асноўнага месцапражывання, што знаходзіцца ў цэнтры Налібоцкага заказніка.

У ведамстве нагадалі, што раней былі рэалізаваны аналагічныя праекты па рассяленні тарпанападобных коней. Акрамя "Налібоцкага", жывёлы ўжо пражываюць у заказніку "Спораўскі", Белавежскай пушчы і інш.-0-