Худык аб форуме Energy Expo: цудоўная пляцоўка для абмену вопытам у сферы зялёнай энергетыкі
17 кастрычніка, Мінск /Кар. БЕЛТА/. Беларускі энергетычны і экалагічны форум Energy Expo - цудоўная пляцоўка для абмену вопытам у сферы зялёнай энергетыкі. Такое меркаванне выказаў міністр прыродных рэсурсаў і аховы навакольнага асяроддзя Андрэй Худык у час адкрыцця форуму, перадае карэспандэнт БЕЛТА.
Міністр нагадаў, што гэта мерапрыемства праводзіцца ў Беларусі ўжо 27-ы раз. "Гэта яркае пацвярджэнне таго, што пляцоўка запатрабавана і развіваецца. Яна з'яўляецца яскравым прыкладам, як развіваецца энергетыка, экалогія і эканоміка ў нашай краіне", - сказаў ён.
Андрэй Худык адзначыў, што абмеркаванне энергетычнай тэмы вельмі важнае, нягледзячы на няпростую геапалітычную сітуацыю ў свеце. "У Год міру і стварэння мы гаворым аб экалагічнай бяспецы і кліматычнай тэматыцы. Я рады, што ўсё больш краін далучаюцца да гэтых пытанняў", - падкрэсліў кіраўнік ведамства.
На форуме сабралася шмат беларускіх і замежных вучоных-практыкаў. Андрэй Худык выказаў упэўненасць, што такія маштабныя мерапрыемствы прадастаўляюць цудоўныя магчымасці для абмену найлепшым вопытам у пытаннях дыверсіфікацыі крыніц энергіі, энергазберажэння і энергаэфектыўнасці, развіцця атамнай энергіі, зялёнай энергетыкі, скарачэння выкідаў парніковых газаў і аховы навакольнага асяроддзя ў цэлым.-0-
