Знішчэнне гнёздаў птушак у Беларусі забаронена з 16 лютага па 14 жніўня
17 лютага, Мінск /Кар. БЕЛТА/. Знішчэнне гнёздаў птушак у Беларусі забаронена з 16 лютага па 14 жніўня (уключна), паведамілі БЕЛТА ў Міністэрстве прыродных рэсурсаў і аховы навакольнага асяроддзя.
Парушэнне забароны вядзе да адказнасці, прадугледжанай Кодэксам аб адміністрацыйных правапарушэннях і іншымі актамі заканадаўства. Так, згодна з арт. 16.23 КоАП за незаконнае разбурэнне гнёздаў птушак прадугледжана накладанне штрафных санкцый на фізічную асобу ў памеры да 30 базавых велічынь (1 БВ - Br37); на індывідуальнага прадпрымальніка - ад 10 да 100 базавых велічынь; на юрыдычную асобу - ад 20 да 500 базавых велічынь.
У адпаведнасці з арт. 19 закона "Аб жывёльным свеце", у перыяд з 15 жніўня па 15 лютага дазваляецца рэгуляваць распаўсюджванне і колькасць птушак, якія прычыняюць шкоду кампанентам прыроднага асяроддзя, а таксама пагаршаюць санітарны і эстэтычны стан населеных пунктаў, жылых, вытворчых, культурна-бытавых і іншых будынкаў або збудаванняў.-0-
