18 верасня, Мінск /Кар. БЕЛТА/. У Беларусі штогод бярэцца на аналіз 10 тыс. проб вады. Такія лічбы прыведзены ў аглядзе да Сусветнага дня маніторынгу вады, які адзначаецца 18 верасня, паведамляе БЕЛТА са спасылкай на Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Нацыянальная сістэма маніторынгу навакольнага асяроддзя ў Беларусі адыгрывае важную ролю ў ахове рэсурсаў і забеспячэнні экалагічнай бяспекі. Увага ўдзяляецца як паверхневым, так і падземным водам.
"Рэгулярны аналітычны кантроль, які праводзіцца з 1993 года, уключае ў сябе збор аналізаў 10 тыс. проб вады штогод. Кантралююцца больш за 500 выпускаў сцёкавых вод у паверхневыя водныя аб'екты", - адзначаецца ў аглядзе.
Што датычыцца вадаёмаў і рэк, то маніторынг ажыццяўляецца ў 297 пунктах назіранняў на 160 водных аб'ектах - 86 вадацёках і 74 вадаёмах.
Гідрахімічныя паказчыкі ацэньвае Рэспубліканскі цэнтр аналітычнага кантролю ў галіне аховы навакольнага асяроддзя (РЦАК), гідрабіялагічныя - Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя. Мінпрыроды распрацаваны праект Стратэгіі кіравання воднымі рэсурсамі ва ўмовах змянення клімату на перыяд да 2030 года.
"Патрабаванні да якасці вады дазваляюць засцерагчы людзей ад небяспекі хваробатворных бактэрый і вірусаў, - адзначылі ў Белгідрамеце. - Веданне аб тым, як праводзіць простыя аналізы якасці вады, дазваляе людзям не толькі ўсвядоміць бягучы стан вадаёмаў у раёне, але і прымаць меры па іх ахове".
Мэта Сусветнага дня маніторынгу вады - павышэнне інфармаванасці насельніцтва аб прымаемых мерах па абароне водных рэсурсаў ад забруджвання.-0-
