16 верасня, Мінск /Кар. БЕЛТА/. Тыдзень мабільнасці стартаваў у Беларусі і завершыцца 22 верасня Днём без аўтамабіля, паведамляе БЕЛТА.
Мэта акцыі - напамін аб тым, як важна скарачаць выкіды ў атмасферу, большая частка якіх паступае ад аўтамабіляў. Прапануецца зрабіць выбар на карысць альтэрнатыўных спосабаў перамяшчэння, а іх нямала: гэта і грамадскі транспарт, а таксама сродкі мабільнасці - веласіпеды, самакаты, монаколы, сегвеі.
Усё, што робіцца ў гэты тыдзень, павінна нагадаць аб негатыўным уплыве аўтамабіляў на навакольнае асяроддзе і падштурхнуць жыхароў сталіцы і іншых рэгіёнаў да выкарыстання альтэрнатыўных спосабаў перамяшчэння. Лепшы спосаб адзначыць Дзень без аўтамабіля - скарыстацца грамадскім транспартам або сродкамі індывідуальнай мабільнасці.
Запланавана шырокая інфармацыйная кампанія: у сродках масавай інфармацыі рэгулярна будуць асвятляцца праблемы забруджвання паветра, а таксама задачы і мэты Тыдня мабільнасці і экалагічнай акцыі. 21 верасня мінскім абанентам некаторых мабільных аператараў будзе адпраўлена СМС-рассылка са слоганам акцыі "Пакінуць аўто дома".
Акрамя таго, у Мінску 21 і 22 верасня выканаюць эксперымент па вымярэнні канцэнтрацыі забруджвальных рэчываў у атмасферным паветры, які праводзіцца з 2016 года. Таксама ва ўстановах адукацыі пройдуць інфармацыйныя гадзіны аб Тыдні мабільнасці і акцыі "Дзень без аўтамабіля "Беларусь за чыстае паветра". У ГЦ "Сталіца" пачала ўжо работу выстаўка "Гісторыя электратранспарту", якая прадоўжыцца да 22 верасня.
Як расказалі ў Мінскім гарадскім камітэце прыродных рэсурсаў і аховы навакольнага асяроддзя, мерапрыемствы запланаваны на тэрыторыях усіх адміністрацыйных раёнаў горада. Таксама вядзецца работа па паляпшэнні інфраструктуры веладарожак сталіцы, у прыватнасці паніжэнні бартавога каменя.
Завяршальным этапам тыдня мабільнасці ў Мінску стане Дзень без аўтамабіля, які ва ўсім свеце адзначаецца 22 верасня. У гэты дзень у парку імя Уга Чавеса з 13.00 да 20.00 пройдзе вялікая колькасць забаўляльных мерапрыемстваў, у тым ліку канцэртна-забаўляльная праграма. Можна будзе наведаць выстаўку электратранспарту, навучыцца вадзіць электрасамакат, ездзіць на монаколе, набыць экатавары і экапрадукты.
Таксама сваю работу прадэманструюць адукацыйныя праекты - зялёныя школы, зялёныя класы беларускай сталіцы. Будзе працаваць кантактны заапарк, можна будзе навучыцца фігурнаму ваджэнню на веласіпедзе, паўдзельнічаць у віктарынах, квестах, конкурсах, зрабіць аквагрым.
Фіналам мерапрыемстваў у Мінску 22 верасня ў 20.00 стане заезд з выкарыстаннем падсвечаных экалагічна чыстых відаў транспарту па маршруце: вул.Каменнагорская - Казіміраўская - Люцынская - Калеснікава.-0-
БЕЛТА - Навiны Беларусi
