5 жніўня, Мінск /Кар. БЕЛТА/. Законапраект па пытаннях нетракарыстання рыхтуецца да разгляду ў першым чытанні, паведаміла журналістам старшыня Пастаяннай камісіі па экалогіі і прыродакарыстанні Палаты прадстаўнікоў Жанна Чарняўская,
перадае карэспандэнт БЕЛТА.
Сёння адбылося пасяджэнне Пастаяннай камісіі па экалогіі і прыродакарыстанні Палаты прадстаўнікоў. Парламентарыі абмеркавалі праект закона "Аб змяненні законаў па пытаннях нетракарыстання", які быў унесены ў Палату прадстаўнікоў Саветам Міністраў Рэспублікі Беларусь 28 ліпеня 2025 года.
"Сыравіна, карысныя выкапні вельмі важны не толькі для стабільнасці нашай эканомікі, гэта яшчэ і імпартазамяшчэнне мінеральных рэсурсаў. Нездарма кіраўнік дзяржавы ўдзяляе столькі ўвагі гэтай тэме. Стаяць асноўныя задачы - вывучыць мінеральна-сыравінную базу, яе праблемы і складанасці і знайсці шляхі вырашэння для павелічэння здабычы карысных выкапняў. Магчыма, даразведаць ужо існуючыя радовішчы, бо прыйшлі новыя тэхналогіі. Мы сёння можам убачыць, якім спосабам зручней і больш здабыць карысных выкапняў", - расказала Жанна Чарняўская.
Законапраект прадугледжвае ўнясенне змяненняў у Кодэкс Рэспублікі Беларусь аб нетрах, Кодэкс унутранага воднага транспарту, закон ад 18 ліпеня 2016 г. "Аб дзяржаўнай экалагічнай экспертызе, стратэгічнай экалагічнай ацэнцы і ацэнцы ўздзеяння на навакольнае асяроддзе". Унясенне змяненняў у Кодэкс Рэспублікі Беларусь аб нетрах абумоўлена неабходнасцю актуалізацыі яго палажэння з улікам практыкі правапрымянення з мэтай выключэння нявызначанасцей, неадназначнага тлумачэння, а таксама неабходнасцю ўзгодненасці з іншымі заканадаўчымі актамі. Галаўной камісіяй па законапраекце вызначана Пастаянная камісія па экалогіі і прыродакарыстанні Палаты прадстаўнікоў.
"Дэпутаты Пастаяннай камісіі па экалогіі і прыродакарыстанні папярэдне прапрацавалі ўжо многія пытанні на базе Навукова-вытворчага цэнтра па геалогіі. Мы вывучалі практыку прымянення і гэта дапамагае сёння працаваць з праектам закона", - адзначыла парламентарый.-0-
