Удзельнікі ХVII Рэспубліканскага экалагічнага форуму, прымеркаванага да Года міру і стварэння,
падкрэсліваючы прыхільнасць да прынцыпаў устойлівага развіцця, абвешчаных у рэзалюцыі Генеральнай Асамблеі ААН ад 25 верасня 2015 г. А/RES/70/1 «Пераўтварэнне нашага свету: Парадак дня ў галіне ўстойлівага развіцця на перыяд да 2030 года»,
прызнаючы важнасць умацавання міжнароднага супрацоўніцтва для сумеснага пошуку рашэнняў стаячага перад сусветнай супольнасцю траістага планетарнага крызісу, выкліканага змяненнем клімату, стратай біяразнастайнасці і павелічэннем забруджвання адходамі, і
адзначаючы, што сучасныя выклікі патрабуюць аб'яднання ўсіх дзяржаў свету, паколькі адна краіна, рэгіён або кантынент не могуць дабіцца гэтага паасобку,
заяўляюць аб недапушчальнасці:
выкарыстання аднабаковых санкцый для выключэння дзяржаў, якія рэалізуюць уласную суверэнную палітыку, з міжнародных стасункаў як на пляцоўках міжнародных міжурадавых арганізацый, так і міжнародных дагавораў;
прымянення палітычна матываваных падыходаў пры прыняцці рашэнняў аб выдзяленні міжнароднага фінансавання з боку міжнародных донараў, што прыводзіць да немагчымасці для значнай групы дзяржаў выконваць свае міжнародныя абавязацельствы ў галіне аховы навакольнага асяроддзя, устойлівага выкарыстання прыродных рэсурсаў і змякчэння наступстваў змянення клімату;
парушэння прынцыпаў міжнароднага экалагічнага права і, у прыватнасці, прынцыпу засцярогі, а таксама абмежавання дзеянняў міжнародных дагавораў пад выглядам забеспячэння нацыянальнай бяспекі. Абуральным прыкладам грубага парушэння абавязацельстваў у галіне аховы біялагічнай і ландшафтнай разнастайнасці стала ўзвядзенне Рэспублікай Польшча загараджальнага збудавання на тэрыторыі аб'екта сусветнай спадчыны ЮНЕСКА «Белавежская пушча»;
заклікаюць да неадкладнага аб'яднання намаганняў усіх без выключэння дзяржаў свету для зніжэння негатыўнага антрапагеннага ўздзеяння на ключавыя экасістэмы Зямлі ў мэтах іх найхутчэйшага аднаўлення, а таксама вызначэння найлепшых шляхоў пошуку забеспячэння балансу паміж эканамічнай актыўнасцю, павелічэннем народанасельніцтва і экалагічнай устойлівасцю.
