4 кастрычніка, Мінск /Кар. БЕЛТА/. Пасяджэнне Камісіі Парламенцкага сходу Саюза Беларусі і Расіі па прыродных рэсурсах, экалогіі і ахове навакольнага асяроддзя адбылося сёння ў Мінску і Маскве ў рэжыме відэа-канферэнц-сувязі, паведамляе карэспандэнт БЕЛТА.
Да ўдзелу былі запрошаны прадстаўнікі Пастаяннага камітэта Саюзнай дзяржавы, Белгідрамета і Расгідрамета, МНС Беларусі і Расіі.
Парламентарыі разгледзелі пытанні падрыхтоўкі сумесных прапаноў аб распрацоўцы праграмы Саюзнай дзяржавы "Забеспячэнне гідраметэаралагічнай бяспекі ва ўмовах зменлівасці і змянення клімату" на 2024-2028 гады і аб распрацоўцы Праграмы сумеснай дзейнасці Беларусі і Расіі ў рамках Саюзнай дзяржавы па пераадоленні негатыўных наступстваў у выніку аварыі на Чарнобыльскай АЭС.
Акрамя таго, абмеркавана пытанне аб ходзе выканання мерапрыемства Саюзнай дзяржавы "Аказанне комплекснай медыцынскай дапамогі асобным катэгорыям грамадзян Беларусі і Расіі, якія зведалі радыеактыўнае ўздзеянне ў выніку катастрофы на Чарнобыльскай АЭС" за першае паўгоддзе 2023 года.
"Сёння на пасяджэнні мы разгледзелі прыярытэтныя напрамкі дзейнасці нашай камісіі. Гэтыя прыярытэтныя напрамкі, як мы вызначалі, павінны рэалізоўвацца ў асноўных праграмах, якія адказваюць за здароўе нашых грамадзян, за развіццё сельскай гаспадаркі, эканамічнага і ваенна-прамысловага блока, - расказаў старшыня Пастаяннай камісіі па пытаннях экалогіі, прыродакарыстання і чарнобыльскай катастрофы Палаты прадстаўнікоў Нацыянальнага сходу Рэспублікі Беларусь, старшыня Камісіі Парламенцкага сходу па прыродных рэсурсах, экалогіі і ахове навакольнага асяроддзя Мікалай Васількоў. - Павінны гэтыя мерапрыемствы рэалізоўвацца ў такіх праграмах, як забеспячэнне гідраметэаралагічнай бяспекі і пераадоленне негатыўных наступстваў у выніку аварыі на Чарнобыльскай АЭС".
"Гэтыя праграмы паспяхова завяршыліся, - удакладніў парламентарый. - Усе мерапрыемствы, якія былі раней прадугледжаны імі - поўнасцю рэалізаваны. Але разам з тым, пры фарміраванні новых праграм мы адточваем асобныя пазіцыі, каб яны задавольвалі патрэбнасці як беларускага боку, так і расійскага, і каб яны знайшлі сваё прымяненне ў Саюзнай дзяржаве.-0-
